Phir milenge

 

(🎶Lag jaa gale , ke phir ye haseen raat ho na ho... shayad phir is janam me mulakat ho na ho... Lag jaa gale ......) ye gaana tumhare sabse pasandeeda gaano me se ek hai .. haan yaad hai ki tumhe purane gaane pasand hai kafi , sunn leti hu kabhi kabhi ... achha lagta hai 

 Dear Umair,

Yaad hai jab hum saath the to lagta tha kafi waqt hai humare paas , din gin-gin kar bitaya karte the kyuki  tab kafi waqt to nhi hota tha magar jo waqt humare paas hota tha wahi kafi hota tha .

Haa .. shayed tab ye sheher aur Khoobsurat hua karta tha , kyu ki mai thi tum the aur gine chune lamhe jo khud me poora tha . magar phir bhi har baar tum ye kehar mulakat ko adhura chhod diya karte the ki ' phir milenge , kafi waqt hai '. Har baar bas sochti rahi ke ab ke baar alvida kahoge to zor se tumhe gale laga lungi .

Ab bhi har roz din gin kar hi guzarti hu, sheher to abhi bhi utni hi khoobsurat hai kyuki yaha mai hu , tumhari yaadein hai aur tumhare saath bitaaye hue pal aur jagah ; jo aaj bhi ye ummeed de jaati hai aur tumhare awaz me dheere se kaano me ye keh jaati hai ki 'phir milenge'. Kafi intezar kiya magar tum naa aaye .

 Tumhare yaad me mai kagaz ki kashtiya bana kar pani me baha diya karti hu ... aur ye kehti hu ke samandar me phir milenge ... aisa krne par Har baar mujhe wahi ummeed milti hai jo ummeed tum diya karte the . Ab tum jhuthe ho sakte ho magar ye ummeed nhi . Yakeen hai ke phir ek din ye sheher poora hoga , mulakat poori hogi aur agar kuch adhoora rahega to wo ummeed hoga .

Kyuki ab ke baar miloge to sochungi nhi , zor se gale laga lungi aur yehi gaana sunaungi jo ab mai sunn rahi hu tumhare yaad me; "lag jaa gale ke fir ye haseen raat ho..na ho..., shayad fir is janam me , mulakat ho na ho..."

                             -Tumhari Pakhi    

          Written by ~ Disha